Serbia Nuk Ka Komision Për Azil

Azilkërkues në Banja Koviljaca | Foto: Beta

Edhe pse mandati i Komisionit për Azil përfundoi më 17 prill, qeveria as nuk ka emëruar anëtarë të rinj dhe as ka shprehur ndonjë qëllim për të zgjatur mandatin e anëtarëve të tanishëm.

“Tani, është e mundur vetëm të zgjaten mandatet e tanishme. Vetëm qeveria e re që do të formohet pas zgjedhjeve mund të emërojë anëtarët e rinj”, tha Miroslava Jelacic, zëdhënësja e Grupit 484, një OJQ që merret me çështjet e azilit.

Organizatat për të drejtat e njeriut, javën e shkuar i kërkuan qeverisë të zgjasë mandatin e komisionit, por qeveria ende nuk i është përgjigjur pozitivisht thirrjes së tyre.

“Duke qenë se është e detyruar të emërojë anëtarët e rinj të komisionit kur iu përfundon mandati, i bëjmë thirrje qeverisë ta bëjë këtë dhe në këtë mënyrë të sigurojë që e drejta kushtetuese për azil të respektohet”, tha deklarata.

Sipas ligjit të tanishëm për azil, një anëtar i komisionit duhet të jetë i diplomuar në drejtësi, me të paktën 5 vite përvojë me çështje të të drejtave të njeriut.

Ndërsa serbët janë në majë të listës së kërkuesve të azilit në botë, numri i personave që po kërkojnë azil në Serbi është gjithashtu në rritje.

Një total prej 976 kërkesash për azil politik janë dërguar në qeverinë serbe midis 1 janarit dhe 31 marsit, vitin e kaluar, pesë herë më shumë se sesa periudhën e njëjtë të vitit 2010, sipas raporti më të fundit të UNHCR-së për azilkërkuesit.

Qendra për Mbrojtjen e Azilit në serbi vlerësoi se rreth 2800 persona kërkuan për azil në vitin 2011.

Sipas qendrës, pjesa më e madhe e azilkërkuesve janë zakonisht nga vendet e botës së tretë, si Afganistani, Pakistani ose Libia, të cilët shkojnë në Serbi për t’iu ikur gjendjes së vështirë ekonomike dhe politike në vendet e tyre.

Banja Koviljaca dhe Bobovadja janë dy qendrat e vetme të azilkërkuesve në Serbi, për momentin.

Procedura e kërkimit të azilit në Serbi ka një numër hapash. Kur një emigrant kalon kufirin në Serbi, duhet të kërkojë azil tek zyrtari i parë i Ministrisë së Brendshme që takon. Pastaj iu jepet një certifikatë, ku regjistrohet synimi për të kërkuar azil, dhe dërgohet në qendrën e azilkërkuesve.