Поранешните српски четници, сè уште без пензии

Споменикот на Михајловиќ на Равна Гора|Фото:Wikicommons

Поранешните српски ројалисти и четнички борци од Втората светска војна, се жалат дека и покрај усвојувањето на законот, кој би требало да им овозможи добивање на воени пензии, тие сѐ уште не добиле ништо.

Со Законот за изедначување на четниците и партизаните, донесен во декември 2004 година, се изедначи и нивниот  придонес во борбата против германската окупација во 40-тите години.

Комисијата за пензии на ветераните, која решава по барањата за пензија, досега, од поранешните четници добила околу 3.000 барања.

Но, ниту едно барање не е одобрено, бидејќи некои членови на комисијата, некогашни партизани, остро му се спротивставуваат на законот.

Југословенските партизани, предводени од Јосип Броз Тито, во суштина беа комунистичка армија, додека четниците, предводена од Генерал Дража Михајловиќ, беа монархисти.

Двете сили, за време на Втората светска војна, беа горки непријатели, но партизаните ги обвинија четниците за соработка со Германците. Откако комунистите ја презедоа  власта во Југославија, четничкото движење беше забрането.

Од седум члена на Комисијата за пензии на ветераните, тројца се од парламентот, а четворица се членови на Сојузот на здруженија на ветераните на Народноослободителната војна од Србија, СУБНОР, кои силно се спротивставуваат на идејата нивните поранешни непријатели да добијат пензии.

Срѓан Среќовиќ, претседател на четничко движење, вели дека членовите на СУБНОР сѐ уште не сакаат да прифатат дека и двете сили одиграле еднаква улога во анти-фашистичката борба.

„Ниту едно барање не е одобрено, бидејќи СУБНОР врши постојана блокада. Јасно е дека не постои политичка волја да се реши ова прашање, па затоа властите треба или да го отстранат СУБНОР или да обезбедат друг начин за почитување на законот“, вели Среќовиќ. 

„Добро е што државата, во најмала рака, го усвои законот и декларативно ги изедначи двете движења, но жалосно е што овие ветерани не добиваат пари, а чесно се бореа за време на војната“, додаде тој.

„Бидејќи само мал број од нив бараат пензии, ова државата не би ја чинело многу“, смета Сречковиќ.

Претставниците на СУБНОР остануваат на својот став дека четниците не биле дел од анти-фашистичкото движење и дека тоа, не можат да станат ниту сега.

Министерството за труд и социјална заштита, кое во 2004 година ги иницираше промените на Законот, може да ги исплати воени пензии на четничките ветерани, без дозвола на Комисијата.

Но, бидејќи до изборите парламентот нема да одржи ниту една седница, понатамошните измени на законот ќе мораат да почекаат на формирањето на новата влада, по општите избори на 6 мај.