Судски процес “Ќушка“: Немало поединечни убиства

Сокиќ Абдула, обвинет за воени злосторства против цивилите, косовски Албанци, во селото Ќушка, во близина на градот Пеќ, во 1999 година, во вторник сведочеше дека сите куќи во селото биле празни, бидејќи сите селани биле собрани во училишниот двор.

„Не е точно дека сум извршувал поединечни убиства по куќите, куќите беа празни. Рашковиќ, кој тврдеше дека сум убивал Албанци, лаже. Сите селани беа во училишниот двор“, изјави Сокиќ.

Зоран Рашковиќ, некогашен член на единицата “Чакали“, сведочеше во декември 2011 година. Тој ги идентификуваше обвинетите и објави детали за настаните во Ќушка, на кои тој им сведочел. Рашковиќ изјави дека тој стоел на 50 метри од местото на убиствата и дека Сокиќ и неколкумина други биле одговорни за нив.

Сокиќ и уште 12 други членови на одредот “Чакали“, кој наводно бил дел од 177. единица на југословенската народна армија, се обвинети за убиство на 43 албански цивили за време на нападот на селото Ќушка, во мај 1999 година.

Според обвинението, одредот бил формиран за да го протера албанското население од територијата на Косово, со цел создавање на етнички чиста област, населена само од Срби.

По нападот, над 400 селани, претежно Албанци, вклучувајќи и жени, деца и постари лица, ги напуштиле своите домови.

Случајот Ќушка е еден од најголемите случаи за воени злосторства кои во моментов се одржуваат пред белградскиот специјален суд. Нападот на Ќушка бил извршен во средина на конфликтот на Косово меѓу српските безбедносни сили и Ослободителната војска на Косово.

Судењето ќе продолжи в среда.