Сребреница: Обвинетиот има чиста совест

Вера Лазиќ, бранител на Јевиќ, во своите завршни зборови изјави дека обвинетиот, во јули 1995 година, бил во околината на Сребреница, во Поточари, каде што извршувал полициски работи, а не во Кравица, каде на 13 и 14 јули 1995 година, биле убиени повеќе од 1.000 мажи.

Таа рече дека Јевиќ лично не ги видел злосторствата и убиствата во Поточари и дека никој не го известил за случувањата.

„На 13 јули, Душко Јевиќ заминал за Зворник, а потоа во Бјелина, каде што останал во текот на ноќта. Во Братунац се вратил дури следниот ден“, рече Лазиќ.

Јевиќ, заедно со Мендељев Ѓуриќ, Горан Марковиќ и Неџо Икониќ, е обвинет за геноцид во Сребреница.

Во обвинението се наведува дека Јевиќ бил командант на тренинг центарот на специјалната полиција на Република Српска “Јахорина“,Ѓуриќ и Икониќ како команданти на чета, а Марковиќ како командант на вод.

Лазиќ истакна дека Јевиќ добивал наредби од Љубомир Боровчанин, кој за време на операцијата спроведена во Сребреница, бил командант на здружените полициски сили. Хашкиот трибунал, за злосторствата извршени во Сребреница, го осуди Боровчанин на 17 години затвор.

„Пресудата на Трибуналот наведува дека Боровчанин не знаел за планот за убиства и дека тој не бил член на заедничкиот злосторнички потфат со цел насилно раселување на луѓето. Ако ова се однесува на Боровчанин, тогаш тоа последователно, се однесува и на Јевиќ, како негов подреден“, рече Лазиќ.

Во своите завршни зборови, Јевиќ изјави дека тој бил директор на Центарот за обука на планината Јахорина, додавајќи дека тоа не е единица, туку камп за обука.

„Додека бевме во Поточари, извршувавме нормална полициска задача на обезбедување на цивилите за време на нивната евакуација, која беше организирана од страна на УНПРОФОР и Војската на Република Српска“, рече Јевиќ, потврдувајќи дека тој, на 13 и 14 јули, не бил присутен во Кравица.

Според Јевиќ, неговата следна задача била да помогне во пребарувањето на теренот, која била спроведена „во согласност со правилата“.

„Не наредив било какви незаконски акции, ниту пак учествував во нивно планирање. Да сум сторил злосторство, самиот ќе бев свој судија. Кога станува збор за активностите опишани во ова обвинение, мојата совест е чиста“, изјави Јевиќ.

Следниот претрес треба да се одржи во четврток, на 5 април, кога одбраната за Мендељев Ѓуриќ ќе ги презентира своите завршни зборови.