Обвинителството бара 28 години за Шешељ

Шешел во 90-те кога држи еден од своите говори Фото: YouTube Printscreen

„Бараме Судскиот совет да го прогласи за виновен по сите девет точки на обвинението, бидејќи се докажа дека е виновен за сериозни злосторства, како по нивниот обем, така и по нивната грозоморна природа“, рече Матијас Маркусен, главниот обвинител на судењето.

"Шешељ не покажа каење", додаде Маркусен.

МКТЈ покрена обвинение против Воислав Шешељ, лидер на Српската Радикална партија, во 2003 година, за прогони врз политичка, расна или верска основа, депортација и нехумани дејства, како и за кршење на обичаите на војување за време на конфликтите во поранешна Југославија, од 1991 до 1993 година.

Според обвинението, Шешељ го испланирал и го наредил етничкото чистење на несрпското население од териториите на источна Хрватска, Босна и Херцеговина и Српската покраина Војводина.

За Шешељ, познат по својата реторика и екстремизам, се тврди дека, наводно, го мобилизирал не само вооруженото крило на Српската Радикална партија, туку и други српски сили, кои ги поттикнувал на прогон на Хрватите и Бошњаците.

Неговите “Шешељовци“, паравоена единица формирана од српски доброволци, наводно, депортирала десетици илјади лица од несрпска националност. Се вели и дека убиле најмалку 905 Хрвати и Бошњаци, силувале и мачеле голем број на цивили, уништиле села и католички и муслимански споменици.

За време на конфликтите во поранешна Југославија, Шешељ тесно соработувал со српските политички лидери Слободан Милошевиќ и Радован Караџиќ, како и со озлогласениот воен злосторник Жељко Ражнатовиќ “Аркан“.

Шешељ доброволно му се предаде на МКТЈ во 2003 година, но неговото судење, после неколку неуспешни обиди за почеток и штрајк со глад од страна на обвинетиот, започна дури во 2007 година.

Шешељ, кој се брани сам, своите завршни зборови ќе ги претстави меѓу 12 и 15 март.

Ова е еден од најдолгите судски случаи во историјата на МКТЈ, кој трае веќе девет години.