Обвинет тврди дека “Чакалите“ имале две формации

Обвинетиот во случајот Ќушка, Среќко Поповиќ, познат под прекарот “Тато“, во петокот, во текот на судењето за воени злосторства против цивилите на Косово, извршени во 1999 година, изјави дека водачот на “Чакалите“, Небојша Миниќ, имал две посебни воени групи.

„Едната беше редовна воена група во рамките на југословенската армија, а втората, тајна, која му служеше за грабежи и убиства. За постоењето на таа тајна единица дознавме тука, на судењето ", рече Поповиќ.

За време на конфликтот на Косово, лидерот на “Чакалите“, Небојша Миниќ, познат како "Командант на смртта", беше резервен полицаец во општина Пеќ.

Тој беше во бегство сè до 2005 година, кога беше уапсен во Аргентина, но истата година, додека траеше процесот на екстрадиција, почина од СИДА.

Поповиќ и 12 други членови на српската воена формација “Чакали“, се обвинети за убиство на 43 цивили Албанци за време на нападот на косовското село Ќушка, во мај 1999.

Според обвинението, одредот бил формиран со цел на Косово да се создаде етнички чиста територија, без албанско население.

Нападот на Ќушка се случи  во средината на конфликтот на Косово, меѓу српските безбедносни сили и Ослободителната војска на Косово, ОВК, во текот на 1998 и 1999 година.

Сведокот на одбраната, Ненад Стојковиќ, поранешен заменик командант на полицијата во општина Пеќ, изјави дека сите српски воени сили, покрај своите редовни активности, имале и посебна задача, да се борат против ОВК.

„Сите ние бевме обучувани за вршење на специјални акции со цел да се спречи ширењето на терористичките активности во областа на градот Пеќ. Не правевме ништо нелегално“, изјави Стојковиќ.

Судењето ќе продолжи на 26 март, во Специјалниот суд во Белград.