Srebrenicë: I Pandehuri Nuk Ishte Prezent në Kohën e të Shtënave

Dëshmitarët Borivoje Jovanovic, Dragomir Jovanovic dhe Mirko Micic thanë se ishin në një festë në shtëpinë e Ilicit, më 13 korrik 1995.

Ditën e nesërme të gjithë shkuan në stacion të autobusit për t’u takuar me vëllanë e Ilicit, i cili po shkonte ushtar.

Dëshmitari tha se Zoran Ilic ishte gjatë gjithë kohës me ta, dhe për më tepër, ishte i shoqëruar me policë gjatë gjithë kohës.

 “E di se Zorani ishte në Serbi dhe se u arrestua nga policia atje. Për këtë arsye e shoqëronte policia, që mos të arratisej”, tha dëshmitari Borivoje Jovanovic.

Zoran Ilic dhe i pandehuri tjetër Dragan Neskovic, të dy ish-anëtarë të policisë speciale të Republikës Srpska, akuzohen se kanë marrë pjesë në kapjen e burrave boshnjakë, më 13 dhe 14 korrik në vitin 1995, të cilët më pas u ekzekutuan në një fermë në fshatin Kravicë.

Sipas aktpadisë, Ilici qëlloi nga një automatik në trupat e të burgosurve tashmë të ekzekutuar, ndërsa Neskovici urdhëroi vrasjen e dy të burgosurve.

Ilic akuzohet gjithashtu për vrasjen e një të burgosuri në fshatin Jelah, më 17 korrik 1995.

Dëshmitari Mirko Micic tha se erdhi në Bratunac nga Beogradi në korrik 1995 dhe se po ndihmonte në organizimin e festës së lamtumirës së vëllait të të pandehurit Ilic.

 “Në festë, gjithashtu dhe ditën më pas, në stacionin e autobusit, Zoran Ilic po shoqërohej nga policia”, tha Micic, duke shpjeguar se i pandehuri ishte dezertor dhe jo anëtar me vullnet i forcave të Republikës Srpska.

Gjyqi është caktuar të vazhdojë më 13 mars.