Srebrenica: Prokuroria Kërkon Dënim Të Gjatë

Në argumentet mbyllëse, prokurori i Shtetit, Dubravko Campara, i bëri thirrje Trupit Gjykues të shpallë Ivanovicin fajtor, duke shtuar se i pandehuri ishte i vetëdijshëm për planin për të asgjësuar boshnjakët në Bosnjën lindore, në korrik 1995.

Prokuroria konsideron se është vërtetuar, pa asnjë dyshim, se Ivanovici mori pjesë, bashkë me persona të tjerë, në vrasjen e 1,0000 boshnjakëve në Kooperativën Bujqësore në Kravicë, më 13 korrik 1995.

“Vrasjet në Kravicë ishin sistematike dhe të planifikuara. I pandehuri dhe ushtarët e tjerë formuan një gjysmë-rreth për të mbuluar të gjitha anët e depos. Pas gjuajtjeve, hodhën bomba nga dera dhe dritaret për t’u siguruar se nuk do të kishte asnjë të mbijetuar, ndërsa Ivanovic shkoi prapa depos për t’u siguruar se asnjë viktimë nuk do të kapërcente nga dritarja”, tha Campara.

Zeljko Ivanovic, ish-anëtar i Skuadrës së Policisë Speciale të dytë në Ministrinë e Punëve të Brendshme në Republikës Srpska, akuzohet se ka marrë pjesë, në korrik të 1995, në shoqërimin e automjetit me banorët e Srebrenicës nga fshati Sandici në depon e Kooperativës Bujqësore në Kravicë, duke ditur se do të ekzekutoheshin.

Në argumentet e tij mbyllëse, prokurori Campara përmendi veçanërisht një deklaratë të dhënë nga dëshmitari i mbrojtur I3, ish-anëtar i policisë speciale të Republikës Srpska, i cili foli në mënyrë specifike për pjesëmarrjen e Ivanovicit në ngjarjet në Kravicë dhe rreth faktit se anëtarët e policisë speciale ishin të vetëdijshme për planin për Srebrenicën.

“Gjërat duhen thirrur me emrat e tyre të vërtetë. Çfarë ndodhi në Srebrenicë në korrik të 1995-ës, ishte gjenocid. Qëllimi ishte të shkatërrohej grupi i boshnjakëve nga Bosnja lindore”, tha prokurori.

Pala mbrojtëse do të prezantojë argumentet e saj mbyllëse të enjten, më 5 prill.