Lajm 29 Nov 12

Serbia: Lirimi i Haradinajt do të Destabilizojë Rajonin

Zyrtarë të Beogradit thonë se nëse Tribunali i Hagës liron ish-liderin e UÇK-së për krime lufte, kjo do të cenojë dialogun mes Serbisë dhe Kosovës.

Marija Ristic
BIRN
Beograd

Ndërsa Serbia pret me padurim aktgjykimin e Tribunalit të Hagës ndaj ish-liderit të UÇK-së, Ramush Haradinaj, liderët thonë se lirimi do të rrezikojë marrëdhëniet ende të brishta mes Kosovës dhe Serbisë.

Duke folur për se çfarë pret nga vendimi i dhomës së apelit të Tribunait të Hagës të enjten për Haradinajn, ish-kryeministër i Kosovës, kryeprokurori për krime lufte në Serbi, Vladimir Vukcevic, thotë se ndihet pozitiv, por i kujdesshëm për shanset për dënim.

“Jam në dijeni se provat kundër tij janë të dobëta dhe ne kemi ndihmuar me atë informacion që kemi, por Tribunali i Hagës u tregua joprofesional dhe i pakujdesshëm”, tha Vukcevic për gazetën ditore serbe “Informer”, duke iu referuar sistemit të mbrojtjes së dëshmitarëve në ICTY.

Ai shtoi se 19 dëshmitarë të mundshëm për rastin janë vrarë.

Këshilltari i presidentit serb, Tomislav Nikolic, Oliver Antic, tha për mediat të mërkurën se lirimi do të rrezikojë dialogun e kryesuar nga BE-ja mes Prishtinës dhe Beogradit.

Kryeministri Ivica Dacic ndërkohë tha se lirimi “do të konfirmojë deklaratat e atyre që thonë se Tribunali i Hagës nuk është gjykatë dhe se qëllimi i vetëm është të plotësojë një agjendë të paracaktuar politike”.

Rasim Ljajic, shefi i këshillit kombëtar serb në ICTY, tha më parë se “asgjë e mirë” nuk mund të pritej në lidhje me rastin e Haradinajt.

Në anën tjetër,shumë kosovarë kanë frikë se presioni nga Serbia mund të lëkundë vendimin përfundimtar.

Tribunali i Hagës liroi Haradinajn dhe të pandehurin tjetër, Idriz Balaj, më 2008 nga akuzat për krime lufte pas një gjyqi trevjeçar. I pandehuri i tretë, Lahi Brahimaj, u dënua me gjashtë vjet për trajtim mizor dhe tortura.

Një rigjykim i pjesshëm i treshes filloi në korrik të vitit 2010, pasi prokurori apeloi duke thënë se gjykata nuk kishte dhënë kohë të mjaftueshme për të dëgjuar prova nga dy dëshmitarë kyç.

Disqus

blog comments powered by Disqus

Buletini ditor