Rasti i Dëbimit do të Rigjykohet

Gjykata e Apelit ka mbështetur apelin e prokurorit të shtetit, të mërkurën, dhe e ka kthyer rastin për rigjykim në Gjykatën Supreme në Podgoricë.

I njëjti trup gjykues, i cili në mars të 2011, i liroi nëntë ish-oficerë policie për akuza për krime lufte në dëbimin e civilëve, do ta rigjykojë rastin.

Milenka Zizic do të jetë kryetare e trupit gjykues.

Arsyeja për rrëzimin e aktgjykimit të instancës së parë ishte se Mali i Zi nuk ishte pjesë e konfliktit ndërkombëtar me Bosnjën dhe Hercegovinën, dhe për më tepër, të pandehurit, duke qenë se ishin oficerë policie, nuk ishin pjesë e forcave ushtarake.

Aktgjykimi, edhe pse nuk e pranoi si krim lufte, thotë se dëbimi i refugjatëve boshnjakë ishte kundër ligjit.

Në pranverë të vitit 1992, të paktën 66 boshnjakë u arrestuan në mënyrë të paligjshme në Mal të Zi dhe u dëbuan për në Republikën Srpska, ku shumica e tyre u ekzekutuan.

Mbi 30 refugjatë serbë të Bosnjës u dëbuan gjithashtu, por nuk dihet nëse ndonjëri prej tyre vdiq pas dëbimit.

Gjatë gjyqit të mëparshëm, të pandehurit thanë se vepruan në përputhje me kërkesën e autoriteteve serbe të Bosnjës për të dëbuar të gjithë ata me kombësi boshnjake, nga mosha 18 deri në 65, kërkesë e cila ishte kaluar nga Ministria e Punëve të Brendshme e Malit të Zi.

“Oficerët e policisë, tani të pandehur, nuk e dinin fatin tragjik që i priste ata njerëz. Ishte praktikë e zakonshme në ish-Jugosllavi që autoritetet e një republike iu bindeshin kërkesave të republikave të tjera”, i tha BIRN-it, Branislav Lutovac, njëri prej avokatëve mbrojtës.

Lutovac tha gjithashtu se gjatë rigjykimit, do ta bazojë mbrojtjen e tij mbi çështjen e përgjegjësisë komanduese.

Data e fillimit të gjyqit të ri nuk është caktuar ende.