Mal i Zi: Apelohet Aktgjykimi për Rastin Bukovica

Në seancën e gjykatës së apelit, të mbajtur të enjten, trupi gjykues diskutoi apelet dhe aktgjykimin e lëshuar në tetor 2011, i cili liroi shtatë ish-policët dhe oficerët e ushtrisë jugosllave.

Aktgjykimi i vitit 2011 gjeti se nuk kishte prova të mjaftueshme të cilat mund të vërtetonin se të pandehurit i torturuan boshnjakët nga zona e Bukovicës dhe i detyruan të linin shtëpitë e tyre më 1992 dhe 1993.

Në seancën dëgjimore të së enjtes, gjyqtarja Svetlana Vujanovic gjatë prezantimit të aktgjykimit, theksoi disa difekte në të.

Aktgjykimi argumenton se banorët e Bukovicës nuk u torturuan, në bazë të provave në video-xhirim, i cili nuk është paraqitur kurrë në gjyq.

“I kam parë dokumentet e gjyqit disa herë, dhe kam gjetur se videoja nuk është paraqitur si evidencë”, raportoi gazeta “Vijesti” se ka thënë Vujanovic gjatë seancës.

Prokurori i shtetit theksoi në apel se Gjykata e Lartë në Bijelo Polje, e cila i liroi të pandehurit në 2011, u dha më shumë besim dëshmitarëve sesa viktimave, të cilët i përshkruan me detaj se çfarë iu ishte bërë.

Aktgjykimi i shkallës së parë në rastin Bukovica është hedhur poshtë një herë, në korrik të 2011. Gjykata e apelit gjeti se emërimi i gjyqtarëve në gjyqin fillestar, nuk ishte në përputhje me ligjin.

Shoqata e Banorëve në ekzil të Bukovicës thotë se, gjatë periudhës 1992-1995, gjashtë boshnjakë u vranë, dy u vetëvranë pasi ishin torturuar, dhe rreth 70 persona ishin torturuar nga Ushtria Jugosllave, oficerët e policisë, si dhe paramilitarët nga zona e Pljevljes, në veri të Malit të Zi.

Gjykata e apelit do të vendosë në dy muajt e ardhshëm nëse do të ketë apo jo një rigjykim të rastit.