Lirohet ish-Komandanti i Policisë Sekrete të Serbisë

Franko Simatovic, ish-komandanti i Njësive të Sigurisë së Sigurisë së Shtetit në Serbi do të lirohet nga paraburgimi deri në fillim të gjyqit të tij më 30 prill, pasi Serbia dha garanci se do të kthehet sërish në Gjykatën Ndërkombëtare për Krime në ish-Jugosllavi.

ICTY hodhi akuza kundër Simatovicit më 2003, duke e paditur për vrasje, persekutim në baza politike, racore dhe fetare, dëbim dhe akte çnjerëzore si dhe transferim të detyruar.

Sipas aktpadisë, nga prilli 1991 deri në dhjetor të 1995, Simatovic dhe Jovica Stanisic, ish-shefi i Shërbimeve të Sigurisë së Shtetit në Serbi, ishin anëtarë të një ndërmarrjeje kriminale të përbashkët që planifikoi dhe urdhëroi ekzekutimin dhe persekutimin e joserbëve në rajonet nën kontrollin serb të Kroacisë dhe Bosnjës.

Persekutimet u bënë në baza të përkatësisë politike, racore ose fetarë, dhe përfshinë vrasje, transferim të detyruar dhe dëbim të kroatëve, myslimanëve të Bosnjës, kroatëve të Bosnjës dhe civilëve të tjerë joserbë.

Simatovic, i cili ka probleme shëndetësore dhe vuan nga depresioni, ka kërkuar lirim të përkohshëm nga paraburgimi në ICTY disa herë edhe më parë, por Serbia nuk siguroi garancitë e duhura.

Trupi gjykues lejoi lirimin e Simatovicit duke qenë se ka një pushim në procesin e gjyqit për të lejuar palën mbrojtëse më shumë kohë për të përgatitur.

Simatovic u arrestua në mars të 2003 në Serbi dhe u transferua më pas në Tribunalin e Hagës. Gjyqi i tij filloi më 2008.