Lirohen të Pandehurit në Rastin Bukovica

Në aktgjykimin e fundit, të enjten, gjykata refuzoi apelet e prokurorit të shtetit dhe familjeve të viktimave, të hedhura në mars.

Shtatë ish-policët dhe oficerët e Ushtrisë Jugosllave ishin akuzuar për trajtimin çnjerëzor, torturim dhe sulm sistematik mbi myslimanët etnikë dhe boshnjakët, gjatë luftës në Bosnjë, duke u përpjekur t’i trembnin dhe t’i dëbonin me forcë nga fshatrat e tyre në zonën e Bukovicës, në veri të Malit të Zi.

Në tetor të vitit 2011, të pandehurit u liruan nga Gjykata Supreme në Bijelo Polje, e cila gjeti se nuk kishte prova të mjaftueshme për të vërtetuar fajësinë e tyre.

Gjykata e Apelit, sidoqoftë, e rishqyrtoi aktgjykimin e vitit 2011, duke thënë se në kohën e ofensivave të dyshuara, veprimet e tyre nuk përbënin vepër penale, sipas ligjit.

Të pandehurit u gjykuan për trajtim çnjerëzor, vepër e cila u bë penale në ligjin e Malit të Zi në vitin 2003, dhjetë vjet pas ngjarjeve të dyshuara në Bukovica, tha gjykata.

Gjykata e Apelit theksoi se baza të tilla për lirim ishin më me vend sesa mungesë provash, siç u tha më parë nga Gjykata Supreme në Bijelo Polje.

Gjyqi për rastin e Bukovicës filloi në vitin 2010. Lirimi, i cili u shqiptua nga Gjykata e Apelit, është vendimi i parë përfundimtar nga katër gjyqet për krimet e luftës që po mbahen për momentin në Mal të Zi.