Rigjykimi i Borislav Mikelicit, ish-kryeministri i shtetit të sapondarë të Kroacisë së asaj kohe, do të mbahet në fund të majit.
Në seancën paragjyqësore të hënën, gjyqtari Zeljko Horvatovic, caktoi datën 24 maj për fillimin e rigjykimit në Gjykatën e Kantonit në Zagreb.
Avokati e Mikelicit, Silvije Degen, kërkoi që Mikelici të rigjykohet pasi u dënua me 20 vjet burgim për dyshimin për krime lufte ne vitin 1993 në Kroaci.
Kresimir Devcic, zëdhënës i Gjykatës së Kantonit në Zagreb, tha se nëntë dëshmitarë priten të dëshmojnë në rigjykim, gjashtë për prokurorinë dhe tre për mbrojtjen.
Seancat e gjykatës do të mbahen më datat 24, 25 dhe 31 maj.
Gjykata e Kantonit në Sisak e shpalli Mikelicin fajtor në vitin 1993 “për koordinimin dhe përgatitjen e rebelimit të armatosur kundër qeverisë kroate” dhe për urdhërimin e sulmeve në qytetin e Petrinjës dhe lokacioneve të tjera në zonë.
Degen thotë se Mikelic ishte në spital në atë kohë dhe se mund ta vërtetojë këtë me të dhënat e spitalit. Ai thotë se dëshmitarët do të konfirmojnë se Mikelic nuk morri pjesë në aktet kriminale.
Degen konfirmoi se Miklic, tani në moshën 73-vjeçare, do të gjykohet përsëri në mungesë.
“Akuzat kundër Mikelicit janë të paqarta dhe mbrojtja e tij në vitin 1993 ishte e turpshme”, tha Degen. “Avokati i tij nuk e apeloi vendimin, duke shpjeguar se provat për fajësinë e Mikelicit ishin të qarta. Ky ishte dhunim i normave bazike gjyqësore dhe etikave të avokatëve”, shtoi ai.
Para fillimit të luftës në Kroaci, Mikelic ishte drejtori i kompanisë prodhuese të mishit “Gavrilovic” me bazë në Petrinja, një nga kompanitë më të mëdha në ish-Jugosllavi. Gjatë luftës, ai u bë kryeministër i Republikës së vetëshpallur serbe të Krajinës.
Pasi ushtria kroate rimori territoret në viti 1995, Mikelic lëvizi në Beograd ku ka jetuar që atëherë.
Në vitin 2003, u arrestua dhe kaloi tre muaj në paraburgim për shkak të përfshirjes së tij të dyshuar në vrasjen e kryeministrit pro-perëndimor serb, Zoran Djindjic.