Dëshmitarët: Mercepi Nuk Ishte Përgjegjës

Branko Saric, Robert Dan dhe Nikola Rukavina i mohuan të martën akuzat se Mercepi, si komandant i njësisë policore “Mercepovci”, urdhëroi personalisht arrestimin e paligjshëm, torturimin dhe vrasjet e civilëve serbë në 1991, në Zagreb dhe në qytetet përreth, Kutina dhe Pakrac, siç thuhet në aktpadi.

Ata mohuan gjithashtu përgjegjësinë e dyshuar të Mercepit për marrjen peng në mënyrë të paligjshme të 52 personave, nga të cilët 43 u vranë dhe tre u zhdukën.

I pyetur nga prokurori se kush ishte komandanti i “Mercepovci” , nëse nuk ishte Mercepi, Saric u përgjigj: “Ministria e Brendshme”.

Saric tha gjithashtu se në Pakracka Poljana nuk ka pasur burgje.

“Nuk jemi kafshë. Gjithmonë i kam mbrojtur më të dobëtit, nuk do kisha lënë diçka të tillë të ndodhte”, tha Saric.

Saric ka qenë i burgosur, nga viti 2005 deri më 2008, i dënuar për arrestimin e paligjshëm të tre burrave në Zagreb dhe mbajtjen e tyre në burgun në Pakracka Poljana, ku ai ishte një nga komandantët e “Mercepovci” në 1991.

Bashkë me tre anëtarë të tjerë të asaj njësie, Saric u dënua gjithashtu për vrasjen e njërit prej anëtarëve të tyre.

Nikola Rukavina, një nga ish komandantët e “Mercepovci”, tha se shumë persona gënjenin dhe prezantoheshin si komandantë.

Sipas Rukavinës, Mercepi merrej kryesisht me menaxhimin e logjistikës.

Ai shtoi gjithashtu se në Pakracka Poljana nuk ka pasur burgje, por pranoi se një grua kishte ardhur në selinë e tyre për të pyetur për fatin e burrit të saj.

Dëshmitari Rober Dan, polic i njësisë, tha se nuk ka marrë asnjëherë ndonjë urdhër nga Mercepi.

Gjyqi do të vazhdojë të mërkurën.