Apelohet Aktgjykimi Për Krimet në Grbavicë

Prokuroria ka kërkuar për një dënim më të gjatë për Baricanin, ndërsa pala mbrojtëse ka kërkuar që aktgjykimi i shkallës së parë të hidhet poshtë. Gjykata e Apelit do të marrë një vendim për apelet, në një datë më të vonë.

Baricanin u dënua me 18 vjet burgim për krime të kryera në Sarajevë, në nëntor të 2011-ës.

Aktgjykimi i vendimit të parë e dënoi Baricanin për përfshirjen e tij në vrasjen e tre anëtarëve të familjes Balvanovic, si dhe për përdhunime të shumëfishta. Ai është gjetur gjithashtu fajtor për skllavërimin e një personi.

Prokurori Behaija Krnjic e apeloi aktgjykimin, duke thënë se procedura e shkallës së parë dështoi të vlerësojë saktësisht rrethanat e rënda.

“Trupi Gjykues nuk ka dhunuar në ndonjë mënyrë të rëndë Procedurën Penale, por ka dështuar të vlerësojë saktësisht rrethana të rënda, të cilat ndikojnë gjatësinë e dënimit. Rekomandoj që dënimi të zgjatet të paktën deri në 20 vjet burgim”, tha Krnjic.

Në anën tjetër, avokati mbrojtës Dusan Tomic kërkoi që aktgjykimi i shkallës së parë të rrëzohet, sepse ka dhunuar procedurën penale dhe i ka vendosur faktet gabimisht. Tomic ka kërkuar që rasti të rigjykohet para Gjykatës së Apelit.

Sipas aktgjykimit të tij, Baricanin mori pjesë në disa krime bashkë me Veselin Vlahovic Batkon, gjyqi i të cilit u mbajt të mërkurën, ku dëshmoi një dëshmitar i mbrojtur.

Dëshmitarja S16 tha se Vlahovic mori bashkëshortin e saj nga apartamenti i tyre në Grbavicë më 22 maj 1992, dhe e rrahu.

Sipas dëshmitares, bashkëshorti e thirri në telefon pasditen e asaj dite dhe i tha se nuk mund t’i tregonte se ku ishte.

“Më thirri prapë ditën e nesërme. Kur e dëgjova, e kuptova se kishte vështirësi të fliste. Dukej se ishte rrahur”, tha dëshmitarja.
Dëshmitarja i tha gjykatës se dy ushtarë e sollën bashkëshortin e saj në shtëpi atë mbrëmje. Më vonë mori vesh se një nga ushtarët ishte Vlahovic.

“Kur e pashë bashkëshortin në derë, ishte i mbuluar me të nxira”, tha dëshmitarja S16, duke shtuar se Vlahovic e mori pastaj bashkëshortin në një dhomë veçmas dhe i kërkoi para.

Kur u kthyen, dëshmitarja tha se bashkëshorti e shikoi dhe i tha: “Të lutem jepu të gjitha stolitë që ke. Po me blen jetën”. E pastaj ajo ia dha të gjitha stolitë që kishte ushtarëve.

Prokuroria akuzon Vlahovicin se ose ka vrarë, ose ka marrë pjesë, në vrasjen e disa personave në Grbavicë, Vracë dhe Kovacic, më 1992. Thuhet gjithashtu se ka marrë pjesë në abuzimin e boshnjakëve dhe kroatëve, dhe se ka konfiskuar ilegalisht para dhe sende të tjera me vlerë.

Gjyqi i Vlahovicit do të vazhdojë më 29 mars 2012.