Судски процес Сребреница: Кос чувствува каење

Обраќајќи му се на Судскиот совет, Кос изјави дека тој морал да учествува во убиството на Бошњаците на фармата Брањево, на 16 јули 1995 година, но дека тој „чувствува жалење за секоја жртва“.

„Дури и една невина жртва е вистинска катастрофа. Жал ми е за секоја жртва што сум ја убил. И се извинувам на секоја жртва и на нејзиното семејство и ќе прифатам секаква казна. Но, најголема казна за мене е тоа што морам да живеам со она што сум им го направил“, рече Кос.

Заедно со Кос, за учество во убиство на повеќе од 800 мажи и момчиња во јули 1995 година на фармата Брањево, обвинети се и Станко Којиќ, Властимир Голијан и Зоран Гороња.

Според обвинението, Кос бил командант на првиот вод на 10-тата диверзантска единица на војската на босанските Срби, додека Којиќ, Голијан и Гороња биле членови на единицата.

Душко Томиќ, адвокат на обвинетиот, изјави дека судењето на Франц Кос е „историско“, бидејќи „никогаш нема повторно да се случи, на еден Словенец да му биде судено за геноцид, извршен врз бошњачко население, од српска страна.

Томиќ изјави дека сите сведоци, освен заштитениот сведок на обвинителство З-1, изјавиле дека членовите на 10-тата диверзантска единица на војската на Република Српска „не знаеле за планот за убиство на Бошњаците во Брањево додека тие, на 16 јули, не пристигнале на целта“.

„Франц Кос сторил ужасно злосторство и убиство, но за разлика од З-1, тој не лажеше и не ја криеше вистината. Тој уште во 1996 година на Хашкиот трибунал му кажа за убиствата. Кос не сака ништо. Тој не тргува со неговите обвиненија. Сам побара, по апсењето во Хрватска, да дојде во Сараево за да му се суди, а можеше да побара да оди во Словенија“, рече Томиќ.

Тој го критикуваше државното обвинителство, кое во своето излагање побара Кос да биде осуден на 45 години затвор, велејќи дека се работи за „драконска казна“.

„Во најмала рака е необично, на пионите да им биде доделена таква казна, а на оние кои го планирале и извршиле геноцидот, им се даваат мали казни, а пред овој суд доаѓаат како сведоци. Тоа не ѝ помага ниту на вистината, ниту на помирувањето“, рече Томиќ.

На Судскиот совет му се обрати и  дополнителниот бранител на Кос, Предраг Дриниќ, кој рече дека убиството на Бошњаци во Сребреница, во јули 1995 година, онака како што е опишано во обвинението, „не може да се карактеризира како геноцид“.

„Од осум илјади наводни жртви, околу две и пол илјади биле убиени во колоната која се пробивала кон Тузла, што значи дека систематски се застрелани околу пет илјади мажи. Се поставува прашањето за правната квалификација на делото. Ако знаеме дека во другите геноцидни дела страдале, да кажеме еден милион Ерменци или да кажеме четири и пол милиони Евреи, мислам дека можеме да ја негираме правната квалификација на делото“, изјави Дриниќ.

Одбрана на Станко Којиќ, своите завршни зборови ќе ги изнесе на 22 мај оваа година.