ЕУ бара истрага за бомбардирањето на РТС

Известувачот на Европскиот парламент за Србија, Јелко Кацин, во средата изјави дека документите кои недостасуваат, а кои ги идентификуваат членовите на српските власти кои знаеле дека РТС ќе биде бомбардирана, се наоѓаат во архивите на српското Министерство за одбрана.

„Првото место каде треба да се побараат сите документи во врска со смртта на 16 вработени на РТС на 23 април, 1999 година, е Министерството за одбрана на Србија. Овие документи се резултат на истрагата спроведена од страна на припадници на Југословенската армија и тие се чуваат во архивите на Министерството“, рече Кацин.

„Тешко е да се верува дека Министерството за одбрана би ги предало тие документи во НАТО и во ЕУ“, објасни Кацин за Радио Слободна Европа.

Кацин одговори на отвореното писмо на српскиот министер за одбрана Драган Шутановац.

Во писмото, Шутановац бара од Кацин да ги искористи своите дипломатски врски за да се лоцираат исчезнатите документи.

„Вашите контакти во ЕУ и НАТО може да ни помогнат да го затвориме ова поглавје еднаш засекогаш, така што би ги добиле документите што ќе докажат дека не постоела можност за предупредување на луѓето за нападот“, вели Шутановац во своето отворено писмо до Кацин.

Причина за јавната дебата меѓу ЕУ известувачот за Србија и министерот за одбрана, е едно неодамнешно писмо, кое не беше објавено во јавноста, во кое Кацин од Србија бара да спроведе сериозна истрага за играта која ја воделе српските власти поврзана со бомбардирањето на РТС.

Во НАТО нападот врз РТС, што се случи на 23 април 1999 година, беа убиени 16 вработени.

Драгољуб Милановиќ, поранешниот шеф на РТС, во 2002 година беше осуден на 10 години затвор, бидејќи за време на НАТО бомбардирањето не ги заштитил своите вработени. Тој е единствениот човек кој досега е осуден.

Семејствата на жртвите, пак, тврдат дека високи функционери во српската влада и армија, знаеле дека бомбардирањето ќе се случи и дека намерно ги оставиле вработените во објектот, само за да можат да покажат дека НАТО убива цивили.

Жанка Стојановиќ, мајка на една од жртвите, вели дека постојат записници кои покажуваат дека властите однапред знаеле дека НАТО ќе ја бомбардира зградата на РТС и дека токму затоа армијата носи одговорност.

Две невладини организации, Центарот за евроатлантски студии и Комитетот на правниците за човекови права, YUKOM, кои во овој случај ги претставуваат жртвите, изјавија дека врз основа на Законот за слобода на информации, во неколку наврати побарале да ги видат овие записници, но дека никогаш, од власта, не добиле одговор.

„Досега обвинителот, за овој случај, не испитал ниту еден сведок или потенцијален осомничен, а владините тела кои ги поседуваат доказите за вмешаноста на армијата во случајот, одбиваат да ги достават до судот“, велат во Комитетот на правниците за човекови права.

По состанокот кој минатата недела, во петок, се одржа со семејствата на жртвите и нивните законски застапници, обвинителството најави дека ќе биде отворена нова истрага.